«Գեղարվեստը կրթահամալիրում» համերգ- ներկայացումը «Մխիթար Սեբաստացի» կրթահամալիրի նախաձեռնած ամենամյա կազմակերպումն է, որ այս անգամ տեղի ունեցավ դեկտեմբերի 20-ին՝ Հայաստանի ազգային պատկերասրահում:
Ներկայացումը հանդիսատեսի համար սկսվեց պատկերասրահի նախասրահից: Այստեղ հրավիրվածներին դիմավորեցին շրջանակով բայց կենդանի Մոնա Լիզան, Ֆրիդա Կալոն և Մարգարտե ականջօղով աղջիկը:
«Կենդանացած» կտավների մասնակցությամբ կրթահամալիրի թատրոն լաբորատորիան ներկայացրեց թատերական ինտերակտիվ էտյուդ:
Հայտնի կտավներից ընտրված կերպարները նախանշում էին միջոցառման թեմատիկան՝ գեղարվեստականությունն ու ընտրված ոճը:
Կատարումներով ներկայացան նաև կրթահամալիրում գործող «Սեբաստիո» ազգային նվագարանների համույթը, Ֆոլկ բենդ գործիքային համույթը, դաստիարակ շվիահարների համույթը:
Հանդիսատեսին ցուցադրությամբ ներկայացան նաև կրթահամալիրի կերպարվեստի, կինո-ֆոտո և տեխնոլոգիական այլ խմբեր:
Ներկայացման ընթացքում համերգային ծրագրով հանդես եկան կիթառահարների, «Սեբաստացիներ» հանրակրթական խմբերգության և վոկալ համույթները, ինչպես նաև կամերային անսամբլը և ուսուցչական երգչախումբը:
Կրթահամալիրի ամենամյա համերգ-ներկայացումը եզրափակվեց «Կենաց երգ», «Ծառ ծաղկեցավ», «Քաղենք խաղողը» երգերի միասնական կատարմամբ։ Կատարողներին ձայնակցելու համար հանդիսատեսն օգտվեց կրթահամալիրի ճամփորդական երգարաններից:
Նյութը՝ Արուսյակ Հոխիկյանի
Լուսանկարները՝ Սմբատ Պետրոսյանի